Aja Nggragas

“Mbah karim mbiyen pesen supaya nandur woh-wohan. Supaya bocah bocah ora padha kepingin woh-wohan nonggone tangga. Malah nek ora keturutan bocah iku isa pada nggragas. Trus direwangi nyolong barang. Mulane ngko nek nduwe lemah, ditanduri ngono lo. Karo wit witan woh wohan”.

Bocah nong ndesa paling paling kepinginane karo panganan. Soale akeh sing isih pada ngeleh sebab kurang mangan sega. Weteng sing ngeleh marai wong wong padha ngiler nek ndelok panganan. Senajan sing ana mek woh wohan thok. Malah kadang isih kemampo. Ning sebabe wetenge ngeleh, ya krasa enak dipangan.

Wis ngeleh trus ora ana panganan liyane, lan do ora nduwe dhuwit nggo tuku, mulane trus padha njaluk ae nong tangga. Nek tanggane apikan ngono ya langsung diweki. Malah biasane kon njupuk dhewe. Ning wong ndesa iku nek njaluk terus-terusan ya krasa ora enak barang. Isin njaluk terus, thik halal lah.

Iku nek tanggane apikan. Nek tanggane medhit, ya ora bakal diweki. Malah diamuk, digrundeli. Trus nek bocah bocah padha nekat isa dibalangi sisan karo watu. Pagere dirapeti. Wite dipasangi carang. Ning dasare bocahe wis kadung nggragas, snajan ngono ya padha mbrobos. Nyolong. Jenenge iku dadi maling !.

Keadaan bocah-bocah saiki mungkin beda karo bocah ndisik. Soale bocah bocah saiki wong tuwane do ora nduwe lemah nggo nandur. Tangga-tanggane ya padha ngono kabeh. Dadi bocah bocah saiki do ora ndenger karo brimbing, srikaya apa jambu kluthuk. Mungkin uga sebab saka cilik wis biasa karo jajanan toko. Mulane sing dingerteni lan diapal ya bangsane ciki, kacang atom, apa es lan mut mutan. Padahal panganan toko iku akeh sing ora sehat. Marai watuk, trus isa gampang lara sebab kakean MSG.

Ning ana sing padha masalah iki. Yoiku padha-padha wetenge do ngeleh. Sebabe nong omah ora dicukupi pangane. Ora dibiasakno mangan sing sehat-sehat, mulane senenge njajan ae. Wong tuwo ya padha ae. Nek ora sabar merhatekno panganane anake, dadine anake diumbar mangan apa ae. Mungkin wong tuwane padha ora kober ngurusi merga ora nduwe wektu. Apa pancen wong tuwane sing keset.

Dadi, padha ae wong tuwo mbiyen karo saiki. Bedane, mbiyen sing dicukupi woh-wohan, nek saiki panganan panganan sing sehat. Kari saiki wong tuwo padha peduli apa ora.

Mungkin do nganggep sepele masalah panganan iki. Ning nek akibate bocah-bocah iku ngko dadi bocah sing nggragas, gaenane njaluki, apa malah do nyolong kan ora sepele neh iku.

Nek sing dicolong pelem apa mut mutan mungkin isih dianggep remeh. Ning sipat nggragas iku isa dadi ngko nggragas karo bandha sing dudu milikke. Coba ngko nek dadi nyolong montor, ngrampok ATM, ngapusi wong, apa nyolong dhuwite negara, piye ?

Neraka iku.